|
Ang Posisyon ng Laban ng Masa sa Halalan Ngayon
Presentasyon ni Sonny Melencio sa Third General Assembly ng Laban ng Masa
November 24, 2018
I. Ang ating pananaw sa halalan
1. Ang Laban ng Masa ay isang sosyalistang koalisyon. Kaya ang ating electoral positioning ay dapat pangunahing nakabatay sa ating adhikain at pananawagan ng sosyalismo.
2. Ang pagtatayo ng sosyalismo ay isang serye ng mga hakbang na babaliktad sa pundasyon ng kasalukuyang kapitalistang lipunan at magtatayo ng bagong pundasyong sosyo-ekonomiko sa bansa.
3. Kung paano ito magaganap, ang tulay na tatantanin sa pagbabago ng lipunan mula kapitalismo tungong sosyalismo ay walang iba kundi ang gobyerno ng masa. Ang pagtatayo ng tunay na gobyerno na pinatatakbo ng masa at para sa masa – kapalit ng kasalukuyang gobyerno ng mga asendero at kapitalista o gobyerno ng mga elitista.
4. Sa sistema ngayon, ang gobyerno o buong estado, kahit sa pinakademokratikong anyo nito, ay isang organisasyon na itinatag ng mga naghaharing uri para protektahan ang interes ng mga naghaharing uri. Ani Friedrich Engels:
The state, even in its most democratic form is the organization which the ruling classes – landowners and capitalists – have provided for themselves in order to protect their social privileges.
4. Ang estado ay hindi isang neutral na institusyon na nagtatayo lamang ng mga kalsada at nagbibigay ng mga serbisyo sa mahihirap o di-kaya’y sa mga sinalanta ng kalamidad at iba pa. Nakapailalim pa rin ito sa relasyong kapitalista – ang mga ahensya at makinarya nito, ang mga proyekto at mga gastos nito – ay nakatuon sa pagsisilbi sa interes ng mga may-kaya, anumang partido ang nasa kapangyarihan.
5. Nakabantad ang katotohanang ito sa Pilipinas, kung saan ang naghaharing uri sa bansa ay inaring sarili ang estado para protektahan at panatilihin ang kanilang paghahari. Hindi maipaghihiwalay sa Pilipinas ang ruling classsa ruling clans(naghaharing dinastiya at pamilya). Kung ang India ay may caste system,mayroon tayong political dynasty na paghahari lamang ng kakarampot na mga pamilya sa halos lahat ng bahagdan ng estado, mula pambansa hanggang lokal.
6. Ang makauring pananaw sa burgis na halalan ay isang paraan ito para ikonsolida ang kapangyarihan ng mga naghaharing uri sa ilalim ng kanyang estado. Kaya paano natin ito haharapin?
7. Kung lumalahok tayo sa burgis na halalan, ang sentral na usapin ay gamitin natin ito para itayo ang independyenteng partido politikal ng masa na ganap na naiiiba at tutol sa lahat ng burgis na partido at nagbabando ng mga independyenteng posisyon at paninindigan ng masa. Kailangan natin ng isang partido o koalisyon, gaya ng Laban ng Masa, na titindig para sa mas malayo o estratehikong layunin ng pagmumulat at pagpapakilos sa masa tungo sa pagkakamit nila ng ganap na kalayaan at panlipunang katubusan. Ani Karl Marx:
The working class must constitute itself as a party distinct from, and opposed to, all old parties formed by the propertied classes as the only means to ensure the triumph of the social revolution and its ultimate end – the abolition of classes.
Independyenteng organisasyon ng masa
8. Isang bagay na hindi natin maikokompromiso sa elitistang halalan ay ang pangangailangang magkaroon ng independyenteng organisasyon ang mga pinaghahariang uri o ang mga marginalized, unrepresented at under-represented na mga sektor ng lipunan (na sa katotohanan ay siyang bumubuo ng mayorya ng populasyon). Sa isang salita, ang MASA.
9. Ang independent organization o coalition na ito ay hindi dapat maging buntot ng anumang burgis na partido. Ani Engels:
The workers’ party must never be the tagtail of any bourgeois party; it must be independent and must have its goal and its own policy.
Layunin sa paglahok
10. Ani Marx at Engels, ang mga naunang nagpundar ng adhikain ng sosyalismo, ang layunin ng paglahok ng manggagawa sa burgis na sistema ng eleksyon ay dahil binibigyan nito ng pagkakataon ang masa na (1) panatilihin ang kanilang independensya, (2) bilangin o ikonsolida ang kanilang pwersa, at (3) dalhin sa paanan ng publiko ang kanilang independyente at radikal na mga tindig sa lahat ng isyu. Diin pa ni Marx:
|